کئچنلرده قار یاغاندا گئدیب- گلیب هی گؤزومو پنجره‌دن ائشیگه زیللردیم. گئجه‌لر ده  قارین یئیین- یاواش یاغدیغینی یوخلاماغا، چیراغلارین ایشیغینا گؤز تیکردیم. بیر شولقوتچیلیق اویاناردی ایچیمده_ دئیه‌سن مدرسه اوشاغيیام، قارین سحره کیمی بیر قلمه یاغدیغیندان، قاپ-باجانی قار آلدیغیندان، اوخوللارین باغلاماغیندان سئوینم _ اوشاقلیغیمدا اولمایان بیر شولقوتچیلیق. او زامانلار تکجه سئوینجک دوشردیم قار یاغاندا.

   آغير قيشلاري‌ لادا سجيّه‌له‌نردي، آدليم شهريم. تبريزين شاختالارينا، تورپاقدا قاتلاشا بيلمزدي، يئر جيريلاردي دئيرلر. قارين ياغماسي، چوخلارينين ياسي اولسادا، كوركچي‌لره بايرام ساييلاردي. دار-‌ بوروق كوچه‌لره اونلارين تام گوج‌لري‌ايله «كورك ايشي اولان» سس‌لري، قاريشاردي آغير قارين كورك- كورك حيطلره- كوچه‌لره دوشوب، هاواني تيتره‌دن تاپپيلتي سس‌لر‌ايله. دربندلرده، اوست-اوسته قالانان قارلار، اولدوقجا ياراردي يئرده‌ـ گؤيده دورمايان قيز اوشاقلاري‌نين گيزلن- قاچ اويناماقلارينا.

   اوخولوموزون يوخوشلو يولو، بوزلو تپه‌لره چئوريلردي اوزون قيشلارين باشا- باشيندا. گوجلو كولك قارشيدان سازاق داشيياندا، آنامين اليندن برك- برك توتوب، كولگه قارشي، ديرَشه-ديرشه، اوزوموزو نئجه اولورسا اولسون اوخولا چاتديرارديق. هردن، هوولاياراق، بيرآز ايستي ايچه‌ريميزدن اووجلاريميزا پوسكوررديك، الجك‌لريميزي اونوداندا ...

   آنام دا من گئدن اوخولدا معلّیم ایدیِ. سینوزیتی اولدوغوندان، تک‌میلده توخودوغو اوزون بویلو، اَنلی شاللارینین بیریسینی اوز-‌ گؤزونه سریتلردی. گؤی گؤزلری، شالین اوزونه سالديغي كولگه‌نين آلتيدان پار- پار پاریلداردی.

   قیشدا گلیب اوخولا چاتماغین چتینلیگی دئیه‌سن بؤیوک- کیچیک تانیمازدی. هامی اودونا دؤنردی. ايلك ساعاتلاردا يول بويو ايليك‌لريمزه ايشله‌ميش سويوق، بيزي كيلاسلارا باغلايان تكجه عاميل‌ايدي، گئت- گئده، دامارلاريمزا ايليق قان آخديقجا، قار گولـله‌سي اويونو بيزي حيطه چكردي. ايلك باخيشدا، اوشاقلارين گئييملرينين آرا- سيرا يانلاريندا، آرخاسيندا، گيلدير-گيلدير قار گولـله‌لري‌نين يئري گ‍‍ؤرونردي. ائله‌جه‌ده بعضاً اوزوموزده آچيلاردي بو قارگولـله‌لري، ديسكينديريجي اولماغينا باخماياراق ديل-دوداغيميزين آراسينا ياييلان سرينليگيني تامسينارديق. قارلي قيش آخشاملاري هله دامارلاريمزا آخان قاينار قان، بوز قنديل‌لريني اووجوموزدا اريدردي، سويوقلوغو كيرميت‌لري سارسيدسادا...

درس گونلري‌نين هر بيري - ياز، قيش- آناما قووشماقلا بيتردي.

   حیطه ساری باخیرام. دونن گئجه یاغان قارین آغیرلیغی، منیم الیمی آنامین ايستي الینه قویوب، ائویمیزه آپاریردی... یئنه حیطه باخیرام. بارماقلاریملا ساچلاریمی آلنیمدان يانلاماق ايسته‌ييرم. نئچه تئل قار کیمی یئلپَنک آغ بيرچكلريمدن، اليمه ساريلير...

    حیطده چهره‌ای، ساری، حنا رنگلی داوودی گوللری، قارین آلتیندا اوزلرین یئره سورتورلر. بويو بوكولو آغاجلار، کورکلرینه یوک قالانان قوجا کیشی‌لر كيمي تورپاغا باش اييبلر سانكي. بیر قاریشدان چوخ قار دوروب قیمه‌لرین اوستونده. گؤزوم نار آغاجینا ساتاشیر. ياري قارا بورنموش نارلار؛ باشلارينا قار آلميش پارتلاق نارلارین قیپ- قیرمیزی دانالاری گؤز وورور، بوللو آغلیق ایچینده؛ آغیز سولاندیریر.

   آیاغا قالخیرام. گئیینیب، سریتله‌نیب، قاپینی آچییب حیطه چیخیرام. قارین گؤز قاماشدیران ایشیغی جانیما سئوینج جالاییر. کورگی گوتوروب، بیر جیغیر یول آچیرام، سونرا یولون هامیسین کوره‌ییب، قارلاری کردیلره آتیرام. هردن بیرین ده نار آغاجینین آلتینا توللايیرام. باشلاییرام قارلاری ایسته‌دیگیم یئره توپلاماغا سونرا تاپداماغا. بئلچه‌ایله برکیمیش قارلارا شکیل وئریرم.

   اوشاق کیمی شوق ائلیرم، ایچیم کئچينیر؛ اورگیم دویونور. بیر یئرده اوخوموشدوم، قوجالیق بیر ماسکا دیر، بیر باتمان چیریش ایله یاپیشار آدامین اوزونه، آرخادا آنجاق گنج اورگی چیرپینار اونون...

   بویونو اوجاتماغا، بئلینی اینجه‌لتمگه چالیشیرام. نه یئرکوکو فیکیرینده‌یم، نه کومور. قارآدامیم گؤزل بیر قادین اولمالیدی.

   گئدیب كاموا تورباسیندان بیر تیکه هؤرلموش آچیق قهوه‌ای كاموا، مینجیق تورباسیندان دا ایکی دانا ایری، گؤی مینجیق چیخاردیرام. مینجیقلاری گؤزلرینه تاخیرام، كامواني تئلینه وساچينا ساخلاييرام. قیزیل گول بوتالارینین بیرینده، هی اؤزونو گؤستریب، غنیمته قالمیش بیر قیزیل گول غونچاسینی دریب، یارپاقلاریندان ایکیسینی دوداقلارینا قویوب؛ بیر-ایکیسینده قارایله اوغوشدوروب یاناقالارینا سورتورم. ایندی شالی گتیرمه‌لیم باشينا سالماغا؛ تک‌میلده توخونموش ماوی ‌شالی؛ بیر نئچه دانا دا دوگمه، آغ پالتوونون اوستونه دوزمگه.

   آخشام قاپی تاپّا- تاپ دویولور. بیلیرم اوزودیر. آتا-آناسی زنگی باسمادان اوّل، اؤزونو قاپییا یئتیرر. قاچا- قاچا حیطه گیریب، تازا آلديغي قیرمیزی پالتوون منه گؤسترمگه، جان آتیر. بیردن گؤزواونا ساتاشير، آغیزی آچیلا قالیر. قارلارا قویلانا- قویلانا اؤزونو اونا چاتدیریر. «اَنّه! او منه ناری دریب.»، دئییر. قوزاناردی، آنجاق بویو چاتمازدی آغاجین دال-بوداغینا، الی یئتیشمزدی نارلارينا. او گئجه نوه‌‌م سئودیگی جیریلمیش ناری دا جوربه‌جورچيلله یئمکلری‌نین یانینا قویموشدو...

   حیطین قوزئی طرفینده دوزتدیگیم قارآدامی، هر گون بیر آز ارییب، الیمدن گئتمکده‌ایدی.